滴滴仔週記
發現日期22/7晚上，來回貓沙盆多次，踎係度，無痾野，出黎喵喵叫
23/7早上，發現有舊金仔係沙盆，尿布無濕，即是無尿痾過，繼續踎沙盆多次
事態非常嚴重，決定要去睇醫生
23/7下午5:30，磅重5.09kg，無發燒，醫生寧寧頭，抱抱肥肥，嘆句：what a bad year! Never ending story! 跟住摸摸膀胱，無儲尿，無尿可放，初步懷疑係膀胱發炎，開左三隻葯：抗生素，vit B，Dantrium，要番去儲尿液樣本，驗下有無crystal
23/7晚上，開罐罐加水，胃口馬馬，每小時用針筒胃佢飲1.5ml水，期間肥肥都會自己走去水兜飲水和食餅餅，依然出出入入踎沙盆多次，不過比我發現佢唔係痾唔出，而係痾滴滴尿，咁好難儲樣本（R頭中），如是者成晚我就陪佢出出入入廁所，其後發現佢lam jur jur ，唔知係咪痛呢
24/7早，驗尿布，無濕，有幾兩金係沙盆，正常程序－＞洗兜－＞開飯－＞食葯，臨出門口再檢查尿布，濕左1/4，應該係肥肥，好似得佢入過去廁所，古古力係廚房等食，mei係廳玩
24/7晚上，開罐罐加水，清碟，繼續人肉打水機，依然無進展，踎沙盆痾滴滴尿
25/7早，發現軟金金，可能食葯（抗生素）引致，胃口好，打3ml水，繼續踎沙盆痾滴滴尿
25/7早11:30，打電話問功課，姑娘叮囑如果再留唔到尿，要帶佢番去診所吊鹽水放尿，lunch趕番屋企灌水和隔離，今晚要繼續灌水
25/7晚上，一番屋企就發覺有一少盤尿，拿拿聲裝起佢再放入雪櫃，繼續觀察睇下有無再新鮮D ge，始終唔係好肯開口飲水，人肉打水機每隔１小時供水一次，每次5ml
26/7早上，正常程序－＞洗兜－＞開飯－＞食葯，胃口好好，未見飲水，個盤無尿，唯有羅雪櫃果D去驗，不過姑娘解釋呢D尿液樣本種唔到菌，如果要種菌必須要帶肥肥去診所直接由膀胱抽出尿液，所以只能驗到有無晶體
26/7早上10:40，化驗報告出左，少量細菌，大量水晶!! 要轉醫生處方糧2星期，期間照常繼續食葯，2星期後再驗小便（（我念緊，佢所講ge水晶，會唔會係unicharm沙粒呢?））
26/7晚上，走去診所買糧－RC Urinary s/o，聲稱會幫助溶化膀胱內的晶體，今晚肥肥無去踎沙盆咁頻密，不過流量仍然較少，要繼續觀察
27/7早，肥肥抵抗力弱左，今朝又打乞痴流鼻涕，不過胃口OK，精神OK，去痾尿次數少左，要强迫飲水
27/7 晚，去沙盆次數明顯少左，胃口好得很
28/7早，好似回復正常，識得扮鬼嚇ah mei，胃口正常，踎廁次數正常，不過流量未合格，人肉打水機要繼續努力（死，我驚習慣左餵佢飲水，佢唔再自己去飲水）
28/7晚，典解感覺今日好似唔係好覺佢去痾野咁??係咪輪到我精神有問題??
29/7 -30/7好似一切回覆正常，希望唔係幻覺，雖然流量都比以前少，咁唯有繼續努力打水，經過今次一役，我覺得其實隻隻鴨都飲少左水，無理由天時暑熱唔飲水格，要念下計仔．．．．唔理乜糧，都要加水
31/7-6/8一切正常，葯食到今日，聽日會再驗小便，睇下會唔會要再食葯
7/8 唔掂，今日放工番到黎見佢小便有血，又成日密密踎沙盆D葯食到尋日食完，今日再驗小便，念住可以葯接葯，報告指出無菌，不過還有好多水晶體，咁一停葯就反而嚴重左，之前未食葯和未轉糧都無痾血便，我問佢有無葯，佢話無，要靠食包糧等D晶體慢慢溶解，叫我比多D水佢飲，咁我再問佢有無消炎葯之類，佢話醫生無講，再覆我，到家陣都未覆，佢叫我聽朝再打黎問醫生，果時6點幾醫生忙緊我念無理由會嚴重左，咁呢兩個禮拜D葯未白食，都係要睇多個醫生羅2nd opinion，Owen，I'm coming........
8/8，book左見Dr Owen，等了兩個小時，終於第一次見面，所以請Owen飲左杯茶，Owen眼明手快收集左杯茶的樣本分別種菌／睇顯微鏡／量ph值，初步睇唔見有晶體，ph值正常，明天要再照ultra-sound才知道有無膀胱石，如果有就要立刻做手術，如果無石就診斷為膀胱發炎，今晚10點後又要戒食lu
9/8早上帶肥肥到O診所照超聲波，由於尋晚到今朝早都無食過野，所以佢好忟憎，想食左個袋咁濟，下午打電話到診所，姑娘話無石仔（thank god），唔使做手術，隨時可以黎接走佢，到時再見見醫生睇下有咩吩咐
13/8終於等到有種菌報告，結果係．．．無菌?!無菌無結晶體無石咁點解會發炎架，醫生話係自發性喎，咁都得??可能係情緒引起，唔知有咩令到佢不安而忍尿，我就黎可以出一本”怪談之怪病實錄”@@
21/8轉左兩個禮拜新葯，初時食完D葯就有少少呆滯，過左一個禮物多D就精神好左，有玩有跳，超級好胃口，所有兜都被肥肥清晒，肥左好多，唔知姑娘有無開錯增肥葯?!我念黎念去，最令肥肥不安，可能係我收起左一個沙盆，佢以前要一個痾尿一個痾屎，家陣得一個，佢可能覺得見污joe所以唔痾忍尿，所以都係放番兩個廁所係度
23/8 食完兩星期葯去覆診，Dr O放假，要睇Dr R，因為之前照過無菌，所以無需再繼續食抗生素，只是食那隻情緒葯多兩個星期，Dr R話食完呢隻情緒葯後，要約時間洗下個鼻鼻啦，未去醫生前，肥肥狂打乞痴，噴晒D鼻涕係個袋入面，入到去診所又無事喎，真激死，Dr R話之前食左咁多種抗生素都唔得，就試下洗鼻，可能有D鼻涕蟲匿埋左係D死角位打唔到出黎，攪到成日番發
有時間可以睇下條link，好詳盡講解呢個病：
http://www.petpetplayland.com/message.php?tid=19399
Labels: 隧道小肥龍
posted by Ah duck @ 7/24/2007 11:45:00 AM
31 comments
31 Comments:
鴨鴨))
留尿種菌啦, 食錯抗生素都好大鑊架! \__/
妖~~ 邊個話會自己好架, 唔會架, 一定要睇醫生架)))))
事態嚴重丫鴨, 不如困起肥肥一貓係房, 分開2個沙盤易分別. 另外, 可以既話, 請日假(咋病啦) 灌水去儲尿啦, 滴滴仔唔得架.
鴨,聽honey同helena講啦,盡快留尿種菌去驗啦,尿道炎/膀胱炎都好,搞得唔好好長手尾架!!
另外,得罪講句,肥肥依家個醫生唔係唔好,但好似唔係咁老黎你丫,鑊鑊新鮮鑊鑊金,有冇考慮下轉醫生呢?
我就係發覺好難留尿
佢痾滴滴仔，都唔知點留
食左兩日葯都好似無咩進展咁ge，重係痾滴滴仔
還有咩方法儲尿
唉~請問香港島，除左Dr M & Dr T之外，重有咩醫生介紹呀~
救命呀~
真係留唔到, 捉佢去醫生度吊鹽水放尿啦!
仲有, 隻抗生素食左3日都冇好轉, 即係唔岩啦, 咁要轉藥架喇, that's why 一定要種菌丫!!
哎呀, 香港區有邊個好呀? 我剩係睇過ewa 炸, owen 又得冇？
honeymeow，我今朝打比診所，佢地就係叫我帶佢返去留院吊鹽水放尿，嚇到我lunchtime拿拿聲番屋企進行一連串隔離和灌水，希望放工番去會見到一盤尿，或者今晚再灌水，唔係明天就要留院V_V
owen好似係旺角OMG對面
鴨,dr.tom搞唔掂,過海啦,call 7折的啦,唔好係佢度留院,總之唔老黎.
鴨))
我唔係想嚇係, 不過我有過非常痛心的經驗.....
黑仔個大佬就係因為庸醫誤診, 用錯抗生素, 小小的膀胱炎變成細菌入血, 再引起急性腎衰竭.......
唔好睇小呢個病, 一定要種菌, 唔好博, 用左抗生素會拖延病情, 小心小心!!
用錯左抗生素會拖延病情!!
(打小個字TIM \_/)
邊條粉腸話唔駛睇醫生?冇尿即係排唔到毒,好大件事架!唔信佢本人自己試吓啦!點都好,肥肥你一定會吉貓天相!大家都支持你同貓奴!毒蘑姨會同貓奴make appointment嚟探你!加油!加油!加油!加油!
鴨仔, 肥肥今日點呀?
如果都係無尿尿留到, 都係聽honey話, 去vet度吊鹽水放尿種菌啦!
仲有, Dr Tom 吾得? 咁都係過海睇owen啦 …
祝肥肥早日康復 …
其實我又覺得T唔係唔得（起碼得過M），只是佢比較老練，見慣大場面，面對所有病症都過份冷靜過份客觀，係超級平常心果隻，你會感覺佢無個份熱心（即是無heart），因為佢唔會一開始就做好多test或比好多葯或去假設好多問題，除非佢仍為有需要，佢會以佢所見所聞並以最簡單的步驟開始進行醫治，所以有時無葯架，對我呢種過份緊張的主人，我就覺得實在太慢啦，最好一擊即中！
大量水晶 @_@ 食藥 D 水晶就會無?(我唔係challenge,我唔識架,想知咋)
鴨,始終抽尿驗清楚細菌好d喎,我驚搞得掂d水晶,之後又搞唔掂d細菌,有排搞丫!!
菲菲, 結晶有2隻, 因應ph值去區分架, 其中有一隻係食藥可以分解, 另一隻就一定要做手術. 不過無論邊一隻都要驗尿先知 (鴨仔已驗? 咁快有結果?)
根據d 書講, 一定係體質問題先另crystal有機可乘, 所以一般有過結晶既貓貓以後都要食配方糧去eliminate某一d mineral囉.
鴨鴨, 快d update我地啦, 緊張丫...
鴨
最常見的做法是先回診所插尿喉放尿加清洗膀胱&尿道 (咁做可以將現有的crystal 全面洗去, 尿道即使有少量crystal 都可以令肥肥柯殊殊時痛得叫救命, 通通尿管有助清走所有crystal, 而且佢咁多日去柯唔得乾淨d尿, 難免有少量毒素積存係膀胱, 順便洗洗佢, 有助抗生素發生功效)
尿液一定要新鮮先可以種到菌, 超過兩個小時的尿尿都冇用架喇, 你最好都係帶肥肥去醫生度留尿種菌, 我建議你叫醫生做插尿喉時順便照張 x-ray (反正麻醉左), 睇睇膀胱有冇乜唔妥!
希望轉咗隻糧,肥肥會好啲啦:))
鴨鴨放心啦^^好快就雨過天晴架喇^0^
咁妳最後有無去睇owen呀???可以去睇下
佢丫,應該幫到妳架:))
嘩義姊，好informative，好勁呀，我會加獎你義弟!!醫生把金口撬唔開，姑娘解釋：肥肥D細菌唔多，可能係有晶體整損左膀胱而引起發炎，可以先試左轉糧兩個禮拜，食完D葯再驗小便．．．bala bala．．．，咁我問：使唔使種菌，姑娘話：試左呢個方法先啦．．．．
我見肥肥今日精神好左，雖然都係飲少左水，不過我都會照做ge，T都唔算庸醫ge，睇下兩個禮拜後點樣，再考慮向九龍區進發~
鴨仔,呢排困肥肥一個係房,確定佢有冇尿尿好d喎,如果真係無痾過尿咪大O樂 @_@
見你話肥肥好翻d, 真係鬆一口氣, 不過唔好鬆懈啊, 繼續做人肉打水機, 加油!!!
知道肥肥好番啲,真係鄧妳開心呀:)))
妳個人肉打水機好有效呀,繼續勞力呀><
仲有呀,妳話隻隻鴨鴨都唔係好願飲水,
我有小小愚見呢=0= 妳可以試下加粒冰
入兜水丫,啲水涼涼地貓地佢地都好鍾意
架^0^ (幣喇!!我叫妳試埋啲咁既野
會唔會比人插架=.=")
靜儀, 加粒冰又點會插你呢? 不過我估都係一dd貓, 我而家屋企近乎長開冷氣, d 水兜既水都好凍..佢地一見我開水喉換d暖水就去飲呢.
水加冰粒引貓飲水,我記得有獸醫都講過架.不過冰粒記住要用熟水整呢.
好似Dr M都講過，不過我就無加冰，係加凍水，所以凍一陣又變熱水，研究研究
希望肥肥無石不用開刀啦 >_< 肥肥加油啊!!!
無石不用開刀!!!!!!!!不幸中之大幸!!!
肥肥叻仔, 快d好番))))))
只係發炎, 食藥就好番, 肥肥叻仔~
陰公囉,辛苦咗成大半個月,希望肥肥快d
好番啦,如果係發炎,就簡單好多喇,對証
下藥唔駛兩日就無事架喇...yeah >0<
今日先知亞肥有事添~
Dr T無理由唔驗野加喎,佢乜都驗一餐架喎,可能無留尿的原因啦~!但anyway, 千期唔好聽d姑娘講的野, 佢成會當自已係獸醫, 加好多personal opinion落去,都唔知邊句係醫生講,邊句係佢講的。點都好, 要直接同獸醫講, 佢唔得閒就叫佢call back, 每個鐘頭打一次電話去追。
Dr Owen除左要等好耐, 佢都ok的。佢醫得好貓地就得啦, 咁肥肥仲有無事,尿尿係咪正常番啦??
有可能
Post a Comment
<< Home